Kuralism

Standard

திருவள்ளுவராண்டு ௨௦௫௦ பொங்கல் தமிழ்ப்புத்தாண்டில் இன்னொரு புதிய செயலில் நானும் முல்லையும் ஈடுபட்டுள்ளோம்.

திருக்குறள் உலகப் பொதுமறை, அனைத்து மாந்தருக்கும் ஏற்புடைய வாழ்வியல் வழிகாட்டி. பல அறிஞர்கள் குறளின் மேன்மையை உலகிற்கு எடுத்துரைத்துள்ளனர், பல்வேறு ஆக்கங்களையும் செய்துள்ளனர்.

எனினும் இன்னும் உலகளவில் குறள் பரவலாகப் பகிரப்படவில்லை. திருவள்ளுவர் உலகப் புகழ்பெற்ற மெய்யியலாலர் வரிசையில் இடம்பெறவில்லை. குறள் போன்ற உயர்ந்த சிந்தனை மற்ற மொழியில் இயற்றப்பட்டிருந்தால் அம்மொழி இனத்தினர் புகழ்ந்து போற்றி உலகறிய செய்திருப்பர்.

வெறும் புலம்புவதில், குறைக்கூறுவதில் எங்களுக்கு என்றுமே உடன்பாடில்லை. எங்களால் இயன்றதை என்றும் முழுமனதோடு செய்துள்ளோம். இந்த 7 ஆண்டுகளில் பல்வேறு திட்டங்களை ஓம்தமிழ் வழி செய்துள்ளோம். தொடர்ந்து செய்துவருகிறோம்.

குறளை உலகளவில் எடுத்துச் செல்லும் முயற்சியாக Kuralism.com எனும் இணையத் தளத்தைத் தொடங்கியுள்ளோம். PWA (Progressive Web App – வளர் வலைச் செயலி) எனும் புதிய நுட்பத்துடன் இத்தளம் முழுமையும் ஆங்கிலத்தில் உருவாக்கப்பட்டுள்ளது.

https://kuralism.com தளத்தைக் காணவும்.

வீரன்

Standard

எங்களின் செல்லக்குட்டி வீரன் நேற்று காலை 9.45 மணியளவில் எங்களது மடியில் இறுதி மூச்சைவிட்டான், உயிரையும் இழந்தான். 8 1/2 ஆண்டுகளாக எங்களின் பிள்ளையாகவே வாழ்ந்தான். இறுதிவரை வீரனாகவே வீழ்ந்தான். எங்கள் மூச்சிருக்கும்வரை நினைவிலே வாழ்வான்!

குறுஞ்செயலி பட்டறை

Standard

மலேசிய உத்தமம் இவ்வாண்டின் தொடர் திட்டமாக நாடு முழுவதும்  இணைய வணிகம் : குறுஞ்செயலி உருவாக்க பட்டறையை செடிக் ஆதரவுடன் வழங்கி வருகின்றது. இப்பட்டறைக்கான பயிற்றியையும், தளத்தினையும், செயலியையும் உருவாக்கி முதன்மை பயிற்றுனராக பொறுப்பேற்றுள்ளேன்.  வாய்ப்பளித்த மலேசிய உத்தமத்தின் தலைவர் நண்பர் திரு. சி.ம.இளந்தமிழுக்கு நன்றி.

உலகத் தாய்மொழி நாள்

Standard

பிப்பிரவரி 21 உலகத் தாய்மொழி நாளாக கொண்டாடப்படுகின்றது. இவ்வாண்டு உலகத் தாய்மொழி நாளுக்கான கருப்பொருள் : “2018 Theme: Linguistic diversity and multilingualism count for sustainable development”. இதனை தமிழில் பன்மொழி இருப்பும் ஆளுகையும் செறிவளர்ச்சியைக் கூட்டும் எனலாம்.

இந்நாள் என் தாய் பிறந்த நாளும் ஆகியதால், எப்பொழுதுமே நினைவில் இருக்கும் நாளாகின்றது. தாய்ப்போல் தாய்மொழியும் நம் உயிர். தமிழை உலகெங்கும் முழங்கச் செய்வோம்!

நான் யார்?

Standard

எனது பெயர் MUHELEN என்று மலேசிய பிறப்பு ஆவணத்தில் என்கணியியல் நம்பிக்கையில் பெற்றோர் (அம்மா : மல்லிகா, அப்பா : முருகன்) பதிந்துள்ளனர். அப்பா பெயரின் மு எழுத்தை தொடக்கத்தில் வைக்க எண்ணி பல பெயர்களைப் பட்டியலிட்டு தமிழில் முகிலன் என இறுதியில் பெயரிட்டுள்ளனர். இதுவே எனது முதல் அடையாளமாகிறது. கூடவே இனம் இந்தியனாகவும் மதம் இந்துவாகவும் குறிப்பிட்டுள்ளது எனது அடுத்த அடையாளங்களாகின்றன.

இராசி, இலக்கினம் எல்லாம் பார்த்தார்களா என்று தெரியவில்லை. ஆனால் பிறந்த நாள் (ஆங்கில ஆண்டின்) அடிப்படையில் ஏதோ கூட்டி 6 வரவேண்டி வைத்த பெயர். ஏன் 6 வரவேண்டும் என்று இன்றுவரை எனக்குத் தெளிவில்லை. இந்தப் பெயரை யார் முதலில் முன்மொழிந்தார் என்பதும் எனக்குத் தெரியவில்லை. ஆனால் முதலில் இப்பெயரை கூப்பிடுவதில் தடுமாற்றம் இருந்ததாக ஆங்கிலவழிக் கல்வி கற்றிருந்த அம்மா கூறியிருக்கின்றார். பிறகு ஆங்கிலத்தில் எழுதி வைத்துக் கொண்டு என்னை அழைக்கத் தொடங்கியிருக்கின்றார். அப்பாவும் ஆங்கிலவழிக் கல்விதான் என்றாலும், தமிழைத் தானாகவே கற்றுக் கொண்டுள்ளதால் (ம.கோ.இராமச்சந்திரனுக்கு நன்றி – இதைப் பற்றி வேறு ஒரு பதிவில் பதிகின்றேன்) அவருக்கு அச்சிக்கல் வந்திருக்க வாய்ப்பில்லை.

வீட்டில் பேசுவது தமிழ் மொழிதான். எனது மழலை சொற்களை அப்பா ஒலிவடிவில் சேமித்துவைத்துள்ளார். தமிழில் தான் பேசியிருக்கின்றேன். எனக்கு நினைவில் இருக்கும் காலம் தொடங்கித் தமிழில்தான் பேசிவருகின்றேன். அம்மாவுக்குத் தமிழ் எழுத படிக்கத் தெரியாமல் போனாலும், தமிழ் மொழியில் பேசுவதில் சிக்கலில்லாமல் போனதால், தமிழே தாய்மொழியாகியது. இருந்தாலும் தமிழ் எனும் சொல்லை நான் முதலில் கேட்டது தமிழ்ப்பள்ளியில் சேரும்போதுதான்.

மொழியைத் தவிர்த்து எனது இளமைக்கால நினைவில் இருக்கும் வேறு அடையாளம் இறைவனை வணங்குதல் (சாமி கும்பிடுதல்). எங்கள் வீட்டு வரவேற்பறையின் ஓரத்தில் காணப்படும் சிறிய மேடையில் ஒரு சாமிப்படம் இருக்கும். அதில் திருநீறு இருக்கும். விளக்கு இருந்த நினைவில்லை. ஒவ்வொரு மாலையும் குளித்த பிறகு அப்படத்தின் முன் நின்று கைக்கூப்பி வணங்கி திருநீற்றை நெற்றியில் சிறியளவு வைப்பதுதான் அன்றாடச் செயல். தூங்கும்போதும் இதனைச் செய்வதுண்டு. பள்ளிக்குச் சென்ற பின்பு, காலையிலும் இது தொடர்ந்தது. அச்சாமிப்படத்தில் சாமி குடும்பமாக அமர்திருப்பதும் கூடவே மாடு, சேவல், மயில், எலி, பால், பழம் இருப்பதைப் பார்த்தவுடன் கண்னை மூடிக்கோண்டு “கடவுளே நான் நல்லா இருக்க வேண்டும், எந்த நோயும் வரக்கூடாது, நல்லா படிக்க உதவ வேண்டும்” என்று சொல்லிக்கொடுத்ததைத் தவறாமல் ஒப்புவிப்பது ஒவ்வொரு நாள் செயலாக ஊறிப்போனது. அந்தப் படம் தான் பின்னாளில் ஏன்? எதற்கு? எனும் கேள்விகள் என் மனதில் எழுவதற்கு அடிப்படையாகவும் அறியாமையறிந்து மெய்ப்பொருள் தேடலுக்கும் வழிவகுத்தது.

08/02/2018

(தொடரும்…)

வாணிகம்

Standard

தமிழ்ப்புத்தாண்டில் புதிய முயற்சியினை மேற்கொள்வது எனக்கும் முல்லைக்கும் வழக்கம். ௨௰௪௩ தமிழ்ப்புத்தாண்டில் (2012) ஓம்தமிழ் இணையச் சேவையை தொடங்கினோம். ௨௰௪௮ தமிழ்ப்புத்தாண்டில் (2017) ஒட்பம் நுட்ப நடுவம் அமைத்தோம். இன்று  ௨௰௪௯ தமிழ்ப்புத்தாண்டில் (2018)  வாணிகம் இணையச் சந்தைத் தளத்தினை அறிமுகப்படுத்துகிறோம்.

இணையவழி வாங்கல் விற்றல் 90களின் இருந்து உலகம் முழுவதும் இருந்து வருகிறது. இருப்பினும், அண்மைய சில ஆண்டுகளில் உள்ளூர்,  உலக நிறுவனங்கள், தொழில்முனைவோர்,  நுகர்வோரிடமிருந்து இணைய வணிகம் அதிக கவனத்தை ஈர்த்து வருகிறது.

உலக இணைய வணிகச் சந்தைகளில் சில்லறை விற்பனையாளர்கள் இன்னும் மூன்றாண்டுகளில் 78.4% அதிகரிப்பார்கள் என எதிர்பார்க்கப்படுவதால், இணையவழி சந்தைகளின் எதிர்பார்ப்புகள் அதிகமாக உள்ளன. இணைய வணிக அதிகரிப்புக்கான காரணங்களில் ஒன்று சந்தைகளின் தொடர்ச்சியான வளர்ச்சியும் ஆகும்.

வாணிகம்.காம் இணைய வணிகச் சந்தையினை மலேசியாவிலிருந்து தொடங்குகிறோம். தற்போது சிறு நடு தொழில் முனைவோர்கள் பல்வேறு பிரிவுகளில் தங்களின் பொருட்களை இணையத்தில் விற்பனைச் செய்ய இத்தளம் உதவுகின்றது.

மலேசியாவில் 4 (ஆங்கிலம், மலாய், தமிழ், சீன) மொழிகளில் வழங்கும் முதல் இணைய வணிகச்சந்தை தளமாகவும் திகழ்வதில் மகிழ்கின்றோம். ஆப்பிள், கூகிள் ஆண்டிரோய்டு கருவிகளில் செயலியாகவும் வெளியிட்டுள்ளோம்.

Wanigam.com தளத்தில் மேல் காண்க.

பொங்கல் தமிழ்ப்புத்தாண்டு

Standard

தமிழுறவுகளுக்கு பொங்கல் தமிழ்ப்புத்தாண்டு நல்வாழ்த்து.

ஓங்கல் இடை வந்து உயர்ந்தோர் தொழ விளங்கி
ஏங்கொலி நீர் ஞாலத்து இருள் அகற்றும் – ஆங் கவற்றுள்
மின்னேர் தனி ஆழி வெங்கதிர் ஒன்று ஏனையது
தன் நேர் இலாத தமிழ்  (பழம்பாடல்)

மலையில் தோன்றி, உயர்ந்தவர் தொழுமாறு விளங்கி, இந்த உலகத்து இருளையெல்லாம் அகற்றுபவை இரண்டு. அவற்றுள் ஒன்று கதிரவன் என்னும் ஞாயிறு. மற்றொன்று தன்னிகரற்ற தமிழ் மொழி.

இவ்வுலகில் உயிர்வாழ காற்றும் உணவும் தேவை. இவை இரண்டும் உருவாக கதிரவன் தேவை. ஆதலால் இந்நாளில் உலக இருளகற்றும் கதிரவனுக்கு நன்றியுடன் பொங்கலிடுகிறோம்.

மலரும் திருவள்ளுவராண்டு ௨௰௪௯-இல், உள்ள இருளகற்றும் தமிழ்மறை திருக்குறள்வழி  மாந்தநேயம், உயிர்நேயம், இயற்கை நேயத்தை நம் வாழ்வினில் பொங்க விடுவோம்; உயர்வோம்!

வணக்கம்

Standard

2017 ஆண்டோடு அனைத்து நட்பு ஊடகங்களிருந்தும் விலகுகிறேன். தமிழும் நுட்பமும் உலகமும் சார்ந்த எனது எண்ணங்களை, செயல்களை தொடர்ந்து இணையத்தில் பதிவுச் செய்திட 2018 ஆண்டில் இத்தளத்தினை தொடங்குகிறேன்…